Imbah Zuhur

PALUI hanyar haja bapindah ka rumah siwaan hanyar di dalam gang. Sebagai urang hanyar di gang itu maka minggu pamulaan itu inya sibuk bapapatuhan wan tetangganya. Ahirnya samunyaan tetangga patuhan wan tahu bahwa Palui urangnya ramah dan suka manulung.

Imbah bulan kadua di gang itu ada warganya nang maninggal, lalu katua RT bahabar bahwa jenazah akan disembahyangkan di langgar RT.

“Kita ada kamatian salah saurang warga di hujung gang sana, sampiyan disaru jua umpat manyambahyangkan,” ujar Katua RT sambil manjulung amplup sadakah fardu kifayah.

“Pas banar, pas banar. Amplup ini masukakan ka dalam daftar les darma itu, kusumbangakan,” ujar Palui lihum karna kada jadi mangaluarkan duit matan kantungnya.

“Baik hati banar sampiyan,” ujar katua RT.

“Kaina imbah zuhur,” ujar katua RT.

Imbah bapapanderan itu katua RT bulik dan Palui langsung tulak ka gawian. Nang kaya biasanya tangah hari inya bulik gasan makan lawan anak bininya di rumah.

Tuntung sembahyang zuhur, warga RT langsung sembahyang fardu kifayah gasan angguta keluarga yang meninggal itu. Tapi sampai tuntung fardu kifayah, kadada kalihatan Palui umpat manyambahyangkan. Ada kawan Palui, yaitu dangsanak Garbus nang badiam di situ, kamariannya mailangi Palui, sambil batakun:

“Ui pakacil Palui, sihat haja kalu?” ujar Garbus “Syukur sihat-sihat haja,” ujar Palui.

“Sampiyan adalah disaru umpat manyambahyangkan warga kita nang maninggal samalam itu,” ujar dangsanak Garbu.

“Hi’ih, aku ada jua disaru manyambahyangkannya imbah zuhur, makanya aku handak ka sana,” ujar Palui.

“Kanapa maka handak ka sana, urang tuntung mamataknya.

Manyambahyangkannya imbah sembahyang zuhur tadi,” ujar Garbus itu.

“Ooo... jadi aku sudah talambatlah? Aku hanyar haja tuntung sembahyang zuhur, makanya aku handak ka sana,” ujar Palui.

“Sampiyan sembayang zuhur pukul barapa? Hari sudah parak asyar,” ujar Garbus lihum.

“Sudah kabiasaanku, imbah makan siang lalu guring, imbah bangun guring hanyar sembahyang. Makanya imbah sembahyang zuhurku ini aku handak umpat mayambayangkan,” ujar Palui.

“Kalu kaya itu salah sampiyan. Waktu zuhur itu paling lambat satangah satu, sedangkan kabiasaan sampiyan itu kada baik karna mamperlambat waktu zuhur” ujar Garbus manyindir.

 “Hi’ih-lah, aku nang salah karna lengah,” ujar Palui tatunduk kada bakutik lagi disindir. emhati(repro) (Sumber Banjarmasin post)