Matan bahari di kampung Palui handak sabarataan panghidupan warganya kada kawa lapas pada sungai. Mulai mandi, batatapas sampai bacari iwak gasan dimakan atau gasan bajual. Satiap baisukan wan kamarian banyak urang nang bamandian di batang atau bakunyungan.
“Parasaan magin bakipit wan basurut haja sungai kita ini,” ujar Tulamak maungkai pandir wayah bapacul baju handak bacabur.
“Sabujurnya kada sungainya nang bakipit Mak ai, tapi awak ikam haja nang makin babangkak,” ujar Garbus mahuluti.
“Bujur haja ujarnya itu Bus ai,” ujar Palui malawanakan Tulamak.
“Masalah pancamaran lingkungan di banua kita ini nang paling utama adalah panyampitan sungai. Sasar tahun sungai kita ini sasar bakipit wan badangkal, kada ada lagi kapal ganal-ganal liwat,” ujar Palui sadih.
“Napa sababnya Lui?” ujar Garbus handak tahu.
“Sababnya adalah sabuting haja yaitu pamahaman kita nang tasalah. Kita masih haja baanggapan bahwa mambuang ratik di sungai itu kada apa-apa, karna kaina pasti larut jua tabawa ulih banyu. Padahal ratik atawa sampah nang kita buang itu lawas-kalawasan bisa maulah sungai kita bahalus wan basurut atau malah bisa kadada lagi.
Balum lagi ditambah limbah buangan dari pabrik-pabrik, tarutama pabrik-pabrik kayu nang banyak tadapat di banua kita ini,” ujar Palui bamagin sadih.
“Ayu lakasi kita bacaburan,” ujar Tulamak. Lalu byurrr...! inya bacabur nangkaya karung baras tahampas. Kada lawas Palui wan Garbus umpat jua bacabur.
Tabulik nangkaya wayah kakanakan pulang kalakuan bubuhannya. Imbah anu basasimburan wan bagagayaan.
“Nah, nangkaya apa kalu kita batanding nangkaya wayah kakanakan balalajuan bakunyung ka subarang sana. Siapa nang tadudi mambayari makan di warung acil Irus kaina siang,” ujar Garbus mambawai Palui wan Tulamak.
“Aku akur haja, amun kawal kita Tulamak hakun takaluar duit gasan mambayari kita badua. Inya pasti nang tadudi sampai, karna bajalan haja manggah mambawa awak apalagi bakunyung, maka paharatan daras-darasnya banyu,” ujar Palui mahahulut Tulamak.
“Ikam jangan tapi maanggap remeh Lui ai. Biar awakku lamak nangkaya ini kawa haja timbul di banyu,” ujar Tulamak kada hakun kalah.
“Ayu siap-siap, satu, dua, tiiiiiiiiigaa!” ujar Tulamak lalu bahancap badahulu, hanyar Garbus lalu imbah itu Palui tadudi. Imbah kada lawas bubuhannya sampai di subarang. Tulamak wan Garbus kahimungan kukuciakan.
“Aku nomor satu!” ujar Tulamak nang badahulu sampai. “Aku nang kadua!” ujar Garbus.
“Mana Palui, dimana Palui? Inya nang cagaran mambayari,” ujar Tulamak mancari Palui.
“Hi-ih dimana inya? Tadi ada haja di balakang,” ujar Garbus bingung jua malihat Palui kada saling sampaian.
“Itu kapalanya mancungul timbul di higa kelotok. Lajui kita babulik ka subarang mandatangi, kita tolongi inya kalu lamas,” ujar Tulamak.
“Lui...Ui Lui, Napa nang ikam ulah, kanapa kada umpat balalajuan?” ujar Garbus manakuni Palui wayah bubuhannya sampai.
“Ssstttt, jangan tapi galu, kaina katahuan,” ujar Palui.
Sakalinya inya lagi mahintip babinian nang bakamih di jamban.
“Manda-i haja Palui pina sadih malihat sungai bahalus, apalagi sampai kada ada lagi. Karna cagar kada kawa lagi mahintipi babinian nang bakamih di sungai,” ujar Tulamak mahahulut kalalanjian Palui. (Sumber Banjarmasin Post)
