Wasi Ranjang

PAHARATAN sunyi panumpang Palui katuju banar mambarasihi sapida muturnya. Tangannya pina kada kawa baranai, pina badabu sadikit haja, pasti dilapnya sapida muturnya nang tuha itu.

“Sadang baganti kunci kaya ampunku,” ujar Tulamak mahapak Palui.

“Bujur Lui ai, kulihat haur babaik haja,” ujar Garbus manambahi.“ Aku masih sayang lawan sapida muturku ini, ujar urang parajakian,” ujar Palui sambil mambarasihi busi. “Sayang atawa kadada duitnya lui?” ujar Tulamak.

“Napa nang ikam sayangi lawan sapida mutur tuha ini? ujar Garbus.

“Bubuhan ikam mahatiakanlah tarikanku salawas ni siapa haja? Banyak bibinian kalu pada lakiannya kalu?

“Itulah sababnya aku kada handak manjual sapida muturku ini, biar tuha tapi wasi nya harat,’ ujar Palui lihum. “Satahuku wasi sapida mutur barataan sama haja, kadada balainan,” ujar Tulamak mangaramputakan.

“Manurut urang nang hawas, wasi sapida muturku ini harat banar. Ujar sidin sapida muturku ini baisi wasi nang maulah babinian katuju, makanya biar buruk aku kada handak malapas,” ujar Palui.

“Napa ngaran wasinya Lui?” ujar Garbus panasaran.

“Wasiku ini adalah wasi ranjang Bus ai. Diawak sapida mutur ni ada sadikit tabuat wasi ranjang, makanya babinian katuju babuat. Itu sababnya aku sayaaaaaang banar, biar tuha tapi oke gitu lo,” ujar Palui tatawa.

“Kadada hubunganya wasi lawan bibinian Lui ai?” ujar Garbus mangaramputakan.

“Bahubungan banar Bus ai, babinian tu amun talihat ranjang bapikir handak barabah haja. Kaya itu jua sapida muturku ini, karana ada tabuat wasi ranjang, makanya satiap bibinian nang bapuat pasti kanyamanan takantuk-kantuk, lalu pingkutan makin bapisit wan jarang nang tasandar di balukukku.

Balukukku rasa galianan tagatuk-gatuk susu bibinian itu. Pokoknya maknyus,” ujar Palui mangalakak.

 “Karamputi Palui bus ai. Inya haja nang bapilih bila maujek, amun takana bibinian inya nang manarik, tapi amun lalakian kita disurungnya. Kadanya barakat wasi ranjang pang,” ujar Tulamak hanyar sadar wan karamput Palui. (Sumber Banjarmasin Post)

Katupat Bahintalu

HARI raya tadi Palui sawat bulik ka Pahuluan. Saminggu inya di sana badandam-dandaman wan kulawarganya. Takumpulan sakaluargaan, datu, julak, nini, kai, pakacil, makacil, sapadangsanakan.

“Ikam bauntung Lui ai kawa bulik ka banua. Kalu aku tapaksa bahari raya di sini haja, karna nang tuhanya sudah habis matian,” ujar Garbus.

“Wayah hari raya ini nang panting kita ingat wan bubuhan nang tuha-tuha, kalu sidin-sidin sudah kadada lagi cukup kita mandoakan sidin. Insya Allah sampai,” ujar Palui.

“Napa nang paling rami wayah batamuan kaluarga itu Lui?” ujar Garbus.

“Nang musti adalah maungkai kisah masing-masing. Kisahnya pasti nang lucu-lucu hingga galagakan tatawa,” ujar Palui.

“Bulik ka banua itu parlu jua Lui ai, lantaran kita hidup di kuta ini rasanya ta-asing banar, wan tatangga di kiri kanan haja jarang batamuan karna saban hari sibuk gawian,” ujar Garbus.

“Di samping batamuan, badandam-dandam, nang jadi tujuan bulik ka banua ini pasti mancari makanan khas banua,” ujar Palui.

“Kalu kaya itu cucuk wan banua ikam mahantup katupat kandangan,” ujar Garbus.

“Pas banar tangguhan ikam itu Bus ai, aku pasti mahantup katupat kasukaanku yaitu katupat bahintalu,” ujar Palui.

“Bujur-bujur Lui bapandir, pabila pulang ada katupat bahintalu. Rasa anih aku mandangarnya. Biasanya nang kudangar adalah katupat balamak, katupat bakuah, katupat baiwak haruan,” ujar Garbus.

“Kada anih Bus ai, mulai matan lagi halus sudah ada katupat bahintalu itu,” ujar Palui.

“Dimana adanya katupat bahintalu itu, apakah nang di Tibung atawa nang di Parincahan atawa di Muhara Gambah?” ujar Garbus pina bingung.

“Pukuknya dimana haja di Kandangan itu pasti ada katupat bahintalu,” ujar Palui mayakinakan.

“Tarus tarang haja Lui ai, aku balum biasa mandangarnya apalagi malihatnya. Nang biasa kudangar bahintalu itu adalah hayam, itik atawa burung, jadi balum tadangar ada katupat bahintalu,” ujar Garbus.

“Kanapa maka ikam pina bingung Bus mandangar katupat bahintalu?” ujar Palui.

“Aku kada bingung Lui ai, tapi marasa hal ini ajaib wan patut dilapurakan ka Musium Muri di Semarang sana, katupat bisa bahintalu,” ujar Garbus.

“Ikam dasar katinggian kajian Bus ai, katupat bahintalu itu maksudku katupat bakuah wan iwaknya adalah hintalu, jadi katupat bahintalu,” ujar Palui bakali-kali manyambat mayakinakan Garbus.

 “Uuu ... itukah maksudnya Lui?” ujar Garbus mulai paham. (Sumber Banjarmasin Post)

Sup Rasa Ganyir

AMUN bajanji Palui kada parnah tapat wan waktu. Kakawalannya rancak banar sarik karna kalalawasan mahadangi. Nangkaya malam itu inya luput pulang wan janji handak tulakan ka wadah urang basalamatan.

“Mana Palui Mak, sudah batangah jam dihadang kada cangul-cangul jua,” ujar Garbus. “Sudah biasa Palui kada cuma mamakai jam karet nang maumatan, tapi tapakai jam batu,” ujar Tulamak manyahut.

“Padahal, samalam inya jua nang bajanji minta hadangi di gardu ini tapi nyatanya pangaramput banar,” ujar Garbus.

“Sabujurnya kita handak ka mana, aku balum paham jua ikam mambawai aku wan Palui,” ujar Tulamak. “Ikam kada tahukah bahwa kita sabarataan disaru julak Ambi, malam ini imbah isya sidin basalamatan,” ujar Garbus.

“Kalu Palui nang bajanji dan inya datang, baiknya kita tinggalakan haja, kita tulakan badahulu,” ujar Tulamak mandangar julak Ambi basalamatan.

“Ayu kita tinggalakan haja, supaya inya jara jangan sampai mangaramputi kita tarus,” ujar Garbus manyatujui ajakan Tulamak supaya tulakan haja.

Sesampainya Garbus wan Tulamak di rumah julak Ambi, urang sudah mambaca doa dan paharatannya basusurung handak makanan.

“Ayu Bus wan Tulamak masukan, makanan sudah tasadia. Ayu sabarataan silakan dimakani haja,” ujar julak Ambi manyuruh.

“Cucuk banar, parut lapar dan makanannya nasi sup, hayam barihit,” ujar Tulamak mahabisakan sapiring lalu batambah pulang. “Mana kawal ikam saikung kada kalihatan?” ujar julak Ambi manakunakan Palui.

“Satumat lagi inya pasti datang bila disaru,” ujar Garbus manangguh karna Palui tamasuk ratik saruan jua.

Imbah tuntung makanan, bubuhannya umpat manulungi basisimpun, lalu Garbus wan Tulamak bapander:

“Mak kumpulakan samunyaan sisa supnya nang kada habis,” ujar Garbus manyuruh Tulamak. “Naahhh ... itu Paluinya datang,” ujar Tulamak manunjuk.

“Pas banar ikam datang Lui ai, ini sudah kusiapakan sapiring jubung. Ayu makani, kami mahadangi ikam bulikan,” ujar Garbus manyurungi Palui sapiring sup, pina likat kuahnya. Langsung Palui mahantupnya, kada toleh kiri kanan lagi.

“Kanyang banar, habis sapiringan,” ujar Palui mariga sambil manapuk parut. “Aku kakanyangan Bus ai, tapi rasa mual parut handak muak. Ikam marasalah sup hayam julak Ambi ini rasa ganyir, masin dan pina lunyak?” ujar Palui.

“Tadi wayah kami makanan nyaman banar, hayamnya barihit, hati wan hampadalnya baracak dan hintalunya sabigian,” ujar Tulamak.

“Tapi kanapa maka supku rasanya anih banar,” ujar Palui.

“Itulah akibat urang pangaramput bajanji dan tadudi saruan,” ujar Garbus. “Mungkin tasalah bumbunya,” ujar Tulamak.

Wayah bulikan bapisah wan Palui hanyar Garbus mambuka rahasianya bahwa sup nang dimakan Palui tadi adalah kumpulan sisa makanan urang, lalu kuahnya ditambahinya wan banyu pambasuhan. “Aku mambalas, karna kada wani tarang-tarangan biar haja kubalas badiam-diam kaya itu,” ujar Garbus mangalalak tatawa.(Sumber Banjarmasin Post)

Banyak Baisian Kupiah

"PUTUNGAN kapala kita ini mana nang baik Bus, apakah bulat, lonjong, basagi atawa dampak," ujar Garbus.

"Tatakunan ikam itu manyindir aku Bus ai," sahut Tulamak.

"Kanapa Mak, apakah kapala ikam tamasuk nang kusambat itu," ujar Garbus.

"Sabujurnya kadada hubungannya Bus ai karena kapalaku ini bulat sasuai wan awakku," ujar Tulamak.

"Aku batakun ini karna handak tahu haja, kalu kapala bulat lalu kaya apa kupiahnya nang cucuk, kalu kapala lonjong kaya apa mudel kupiahnya," ujar Garbus.

"Ikam batakun bantuk kapala itu apakah karna ikam handak mambagi kupiah? Aku akur banar Bus ai. Kupiah nang cucuk gasan kapalaku adalah nomor anam," ujar Tulamak.

"Cuba ikam tangguh Mak, kapala Palui itu cucuknya kupiah nomor barapa?" ujar Garbus manunjuk Palui nang hanyar cangul.

"Kapala Palui ini kada kawa diukur karna babenjol-benjol," ujar Tulamak lihum.

"Aku paham haja Mak ai, ikam ini musti tatarik wan kupiahku nang mudel hanyar ini. Tarus tarang haja, kalu ikam handak, kubari dan bila ikam cuma handak mainjam maka kuinjami," ujar Palui.

"Aku hiran jua Mak ai, satiap ada mudel kupiah hanyar pasti si Palui ini baisian," ujar Garbus.

"Hi’ih, macam-macam mudelnya dan macam-macam jua balangnya, ada hirang, habang, hijau, kupiah haji. Tapi aku hiran jua Bus ai, ampun maaflah, samunyaan kupiah Palui itu kadada nang hanyarnya, pina buruk-buruk samunyaan. Karna kalu mudel hanyar pasti hanyar manukar, kalu mudel hanyar tapi buruk artinya kupiah bakas pakaian," ujar Tulamak mulai curiga.

"Bujurkah Lui ucapan Tulamak itu?" ujar Garbus.

"Daripada aku dibantai Tulamak labih baik aku batarus terang haja wan bubuhan ikam ini Bus ai," ujar Palui handak mangaku.

"Aku banyak baisian kupiah ini karna rancak tabawa kupiah wakaf di masigit. Wayah handak sembahyang aku kada ingat mambawa kupiah lalu kuinjam kupiah wakap nang ada bagantungan di kapstok masigit atawa di langgar.

Wayah bulikannya aku kada ingat mamacul lalu tabawa bulik ka rumah. Makanya aku banyak baisian kupiah. Tapi aku sudah bajanji cagar mambulikakan samunyaannya," ujar Palui tarus terang mangakui kasalahannya. (tam) - Sumber Banjarmasin Post.

Ubat Talarang

KADA lawas tadi, di kalurahan kadatangan tamu matan bubuhan kapulisian nang handak mambari panyuluhan atau susialisasi tantang narkuba wan warga kampung. Lalu ulih Pambakal Anjam dikumpulakan bubuhan pamuda, tamasuk bubuhan Palui, Tulamak wan Garbus.

“Tarima kasih kapada para kakawalan sabarataan sudah hakun datang bakumpul mandangarakan anjuran Kapulsek tadi,” ujar pambakal manutup acara.

“Kami pihak kalurahan wan kapulisian mangharapakan supaya bubuhan ikam jangan tapangaruh wan pargaulan bibas wayahini, rami mauntal ubat bamamaukan sampai tapalengor. Kada bulih umpatan mamakan ubat talarang dan kada bulih umpatan bajualan ubat talarang, bisa ditangkap pulisi,” ujar pambakal.

“Aju ja kami sabarataan paham pambakal ai,” ujar bubuhan pamuda.

Satangah bulan imbah panyuluhan tentang ubat talarang itu, Palui balapur wan pambakal, bahwa inya hanyar malapurakan wan manyuruh tangkap Garbus wan Tulamak.

“Mana Garbus wan Tulamaknya?” ujar pambakal.

“Inya badua ada di kantur sektur, ditangkap dan dikurung,” ujar Palui.

“Ikam talanjur purun banar Lui ai kanapa maka malapurakan Garbus wan Tulamak ka pulisi, padahal inya kawan karib ikam. Napa salahnya? Ayu kita ka kantur sektur.”

Imbah sampai di kantur sektur, Pambakal Anjam manakuni patugasnya. “Kanapa maka Garbus wan Tulamak ditangkap,” ujar pambakal.

“Manurut lapuran Palui bahwa inya badua itu bajual ubat talarang, makanya kami tahan handak kami pariksa. Si Garbus nang manjual dan si Tulamak nang manukari,” ujar patugas.

“Bujurkah Bus ikam nang manjual ubat talarang dan Tulamak nang manukarinya?” ujar pambakal.

“Hi-ih, bujur pambakal ai. Aku bajual ubat itu talarang pada di tuku karna handak bahujung sadikit, maklum mudalnya halus supaya kawa mamutar pulang. Ulun bujur jua manukari ubat talarang itu karna ulun anggap papadaan, jadi kada napa-napa talarang sadikit gasan kawan jua,” ujar Tulamak. “Bulih haja kalu bajual ubat ngalu kapala wan ubat nyamuk itu?” ujar Garbus.

“Kanapa maka ikam lapurakan Lui, inya badua bajual ubat biasa haja, kada talarang, kadada narkutiknya,” ujar pambakal.

“Inya bajual ubat itu larang pada di tuku ubat, kasihan kalu urang lain nang kada baduit. Di tuku haraganya murah cuma saribu, Garbus bajual dua ribu, jadi artinya inya itu bajual ubat talarang pada di tuku,” ujar Palui manarangakan.

“Aku paham Lui ai, bulih haja bajual larang karna handak banyak hujung. Kukira tadi ubat talarang nang baisi narkutik itu,” ujar pambakal.

“Kalu kaya itu Garbus wan Tulamak kada salah, ayu lakasi bawai bulikan dan ikam minta maaf hanya gara-gara salah paham,” ujar Pambakal manyuruh basalaman (Sumber Banjarmasin Post)

Pamanis Haja

PALUI wan kakawalannya maambil upah borongan batatabas di kantor kalurahan, napa rumputnya sudah pina tinggi-tinggi. Tapi karna dikarubuti batiga makanya sabalum tangah hari gawian batatabasnya sudah handak tuntung.

"Imbah tuntung bagawi borongan tabasan ini, kita makanan," ujar Tulamak.

"Ikam ini Mak ai makanan tarus nang dihatiakan," ujar Garbus.

"Gasan nangapa duit kalu kada gasan makan, apalagi uyuh-uyuh bagawi bahaharian ini," ujar Tulamak.

"Aku akur haja imbah bagawi ini makanan, tapi sabalumnya kita babarasih awak, baudhu lalu sembahyang. Imbah tuntung sembahyang hanyar kita bapikir makanan," ujar Palui

"Tapi ada syaratnya, karna gawian kita ini pas-pasan upahnya maka kita ‘BSS’ haja," ujar Tulamak.

"Aku akur, jadi sapamilih saurang haja napa nang handak dimakan, handak nyaman bayarnya larang atawa handak nang murah-murah haja. Tasarah masing-masing," ujar Garbus.

"Aku pasan nasi rawon, banyaki kuahnya nyaman kaina kawa batambah nasinya," ujar Tulamak.

"Aku pasan soto wan satinya sapuluh cucuk," ujar Palui.

"Aku pasan gado-gado haja, banyak pitaminnya," ujar Garbus.

Wayah samunyaan sudah sadi maka bubuhannya baimbai makanan. Tulamak ancap banar mahabisakan nasi rawonnya, lalu minta batambah pulang. Garbus makannya pina lambat karna inya sakit gigi.

Sedangkan Palui sabalum mamakan sotonya, inya mamakan sati, tapi nang dimakannya tunggal bilahan cuma sahiris-sahiris sati hujungnya haja, hingga tiap cucuk tasisa tiga atawa ampat hiris.

Lalu imbah tuntung mamakan sahiri-sahiris itu lalu inya mulai mamakan sotonya.

"Ayu, siapa handak sati ambillah," ujar Palui pura-pura manawari Garbus wan Tulamak.

"Aku sakit gigi Lui ai kada kawa makan daging," sahut Garbus sambil manyirit sati nang sudah pina basisa tunggal bilahan.

"Ayu Mak, rasani," ujar Palui manyuruh.

"Sabujurnya aku handak jua marasani tapi... samunyaan bakas muntung ikam," ujar Tulamak.

"Ikam tu pamanisnya banar ai Lui ai, kami paham haja. Ikam pupura manawari kami, tapi samunyaan sati sudah ikam iguti supaya kami kada maminta."

"Hahaha," ujar Palui tatawa karna akal kancilnyanya katahuan kakawalannya. "Aku tu kada parlu bapamanis-pamanis Mak ai, kan aku sudah manis," ujar Palui manuruti iklan di tivi.(Sumber Banjarmasin post)

Takutan Dipangkung

TULAMAK manyaru bubuhan kakawalannya Palui, Garbus, Tuhirang wan tukacut, kaina malam basalamatan maaqikahi anaknya nang hanyar lahir.

Karna anaknya itu lalakian jadi inya manyumbalih dua ikung kambing. Tapi wayah acara rupanya Palui kada datang karna inya harus tulak ka Banjar mailangi paniniannya.

Isuknya si Palui datang ka rumah Tulamak handak minta maaf karna malamnya kada kawa datang saruan baaqikahan.

“Aku maaf banar samalam kada datang karna tulak ka Banjar mailangi paninian, hari hujan labat tapaksa tapamalam,” ujar Palui.

“Aku maklum haja Lui ai,” ujar Tulamak manyuruhakan Palui duduk lalu inya langsung kabalakang ma-ambilakan makanan wan nginuman.

“Pas banar Lui ai, ikam kutinggali kapala kambing, silakan makan,” ujar Tulamak.

“Ikam paham banar kasukaanku Mak ai,” ujar Palui sambil mulai makan mahantup utak kapala kambing.

Kada lawas datang bini Tulamak, takajut malihat Palui makan kapala kambing nang disimpannya dalam lamari. Mulai matan higa lawang bini Tulamak babarapa kali mancelengi lakinya.

Wayah mancelengi lakinya itu sawat kalihatan ulih Palui, lalu Palui marasa bahwa bini Tulamak sarik maka Palui makin bacapat mahabisakan nasinya.

“Ayu lakasi batambah, nasi masih banyak dan habisakan utaknya,” ujar Tulamak manyuruh Palui.

“Aku sudah kanyang, kulihat langit maram mungkin cagar ada patir,” sahut Palui karna inya maklum sudah babarapa kali kana celengi bini Tulamak.

“Kada usah lakas bulik Lui ai, kada mungkin ada patir karna hari panas banar,” ujar Tulamak karna inya kada paham bininya saceleng-celeng. Palui langsung badiri, parmisi lalu handak bulik.

“Hadangi-hadangi,” ujar bini Tulamak bagagasakan maacungakan payung. Malihat bini Tulamak pina mamahing maka Palui makin takutan lalu langsung bukah saling lajuan karna mulai matan makan tadi bini Tulamak itu dilihatnya pina saceleng-celeng.

“Kanapa maka ikam handak mamangkung Palui,” ujar Tulamak.

“Aku kada handak mamangkung Palui tapi handak manitipakan payung bininya nang katinggalan di rumah kita,” ujar bini Tulamak lalu mamukulakan kaawak lakinya karna kasasarikan kapala kambing kasukaannya disurungakan ka Palui. (Sumber Banjarmasin Post)