Sajadah Palui

WAYAHINI sudah masuk musim haji pulang. Bubuhan Palui wan kakawalannya rami mamander kisah-kisah urang bahaji.

“Aku ingat kisah arwah kai Bus ai, bahwa di Makkah atawa di Madinah itu kadada tikar sambahyang,” ujar Palui.

“Kada mungkin Lui ai, justru pada musim haji tiap tahun habarnya pamarintah Arab di sana manyadiakan ribuan bahkan puluh ribu lambar tikar sambahyang. Kada cuma tikar bahkan hambal-hambal nang kandal dan larang-larang haraganya disadiakannya,” ujar Garbus.

“Tapi hambal itu hambal sambahyanglah Bus?” ujar Palui. “Hi’ih, tikar dan hambal sambahyang,” ujar Garbus mayakinakan Palui.

“Aku kada parcaya dan itu kada mungkin Bus ai, amun ada jua aku wani batilanjang bulik matan sini sampai ka rumah,” ujar Palui.

“Dasar talalu banar Lui ai kalu ikam mangaramputakan,”ujar Garbus masih balum paham maksud Palui.

“Tarnyata lain Palui nang pambabal tapi ikam Bus ai nang bangak dan batat kada pamahaman maksud Palui itu,” ujar Tulamak mangalakak mananawaakan Garbus nang pina bingung.  

“Sabujurnya napa nang dimaksud Palui itu?” ujar Garbus.

“Nang dimaksud Palui itu adalah apakah ada ‘tikar atawa hambal nang jungkang ruat sambahyang’ kaya manusia badiri tagak, ruku atawa sujud?” ujar Tulamak manarangkakan.

“Aku tarus tarang haja mangaku kalah Lui ai. Tapi aku kaingatan wan kalakuan Palui dahulu nang mamadahakan bahwa inya ada baisian sajadah antik, warisan matan kainya,” ujar Garbus baniat handak mambalas.

“Bujur-bujur antiklah Bus, kaya apa balangnya, kaya apa gambarnya, samalah wan sajadah wayahini bawaan urang naik haji itu?” ujar Tulamak.

Palui badiam haja mandangarakan panderan Garbus wan Tulamak, inya kada umpat bapander dan kada umpat manyahut.

“Bujur-bujur antik, wayah kami sambahyang di masingit kami sabuting sajadah badua. Imbah sambahyang itu, aku baminggu-minggu garing batukan,” ujar Garbus.

“Napa sababnya Bus?” ujar ujar Tulamak.

“Sakalinya sajadah Palui itu bujur-bujur antik, tapi nang antik kada banangnya atawa balangnya, nang antik adalah........ manyalingit baunya,” ujar Garbus wahin karna masih kaingatan.

“Aku minta maaf Bus ai, bau itu lainan bau minyak harum hajar aswad atawa minyak harum malaikat subuh tapi adalah bakas liur basiku karna wayah itu tapaksa kujadiakan bantal gasan kakalang kapala wayah taguring di masigit,” ujar Palui sambil tatawa mangaku tarus tarang mangalahakan Garbus. (Sumber B.Post)