Ampih Manyasak

Rami banar di kampung palui bapangentenan, Kada halat bulan, paling halat minggu urang basaruan atawa baundangan, maklum parak musim panghujan.

Sahari bisa ampat lima wadah nang harus didatangi. Kada kaawakan palui tulak kasaruan.

 

“Uma ai Lui, pina bengkeng banar ikam hari ini,” ujar Tulamak mamuji Palui.

 

“Amun dasar tumatan lagi diparut aku ni bengkeng,” ujar palui baagak.

 

“Barapa mambari bubuhan ikam?” ujar Garbus manakuni Palui wan Tulamak sambil mangaluarakan amplok.

 

“Aku haraga sapiring nasi jua,” ujar Tulamak.

 

“Barapa jatah sapiring nasi tu Mak?” ujar Garbus pulang.

 

“Sabujurnya urang kada tahu jua kita mambari barapa.

 

Amun dibuat dalam amplop jua,” ujar palui mamulun ribuan.

 

“Barapa ikam buat Lui, pina kandal banar?” ujar Garbus manakuni Palui.

 

“Itu rahasia Bus ai. Kada bulih disambatakan,” ujar palui hancap mambuat amplopnya ka kantung.

 

“Aku suah mahintipakan, Palui itu mambari satangah nasi bungkus alias tiga ribu haja. Cuma ribuan digumpalnya jadi kalihatan kandal, ujar Tulamak mambungkar rahasia Palui.

 

“Huuusss! jangan nyaring-nyaring,” ujar Palui manutupi muntung Tulamak.

 

“Sasuai wan parinsipku Mak ai, kita tu harus bahujung bila tulak ka undangan,” ujar Palui mamadahi.

 

“Urang hidup bamasarakat itu kada bulih talalu pamalar Lui ai. Kalu kaina ikam dibalas urang jua wayah mangawinakan anak.“ ujar Tulamak mamadahi.

 

“Itu lihati kasian abah Ijul manyasak Lui,” ujar Tulamak manunjuk ka abah Ijul nang lagi manarima tamu.

 

“Lajui, kasai minyak angin, kasian kalu pingsan,” ujar garbus.

 

“Dasar kada pamahaman ikam ni Bus ai. Sidin kada manyasak garing, tapi manyasak duit,” ujar Tulamak manumpalak Garbus.

 

“Wayah ini urang pangantenan ampih sudah manyasak Mak ai,” ujar Palui.

 

“Kanapa maka ampih Lui?”

 

“Coba itihi ikam satiap urang pangantenan, pasti ada basadia pakucuran gasan tatamba sidin kalu manyasak. Lihati dihiga-higanya. Ada kalu?” ujar Palui manunjuk ka guci wadah maandak amplok salam tempel.

 

“Hi-ih lah, bujur banar lui ai. Pintar jua lah urang wayahini maulahakan pakucurannya, ujar Tulamak lihum.

 

“Baapa lagi urang bapangentenan maandak pakucuran?” ujar Garbus kada paham.

 

“Ngalih jua bapander lawan urang kada cardas,” ujar Palui mambawai tulamak bulikan. 

(Sumber Banjarmasin Post)