Mambengkok Tarus

WAYAH ini di tipi wan surat kabar banyak habar tantang aliran sasat, alias sudah balalain haja, manyimpang pada nang dianjurakan Al Qur’an wan hadist nabi. Ada nang mahapusakan sambahyang lima waktu, ada nang jua mangaku Imam Mahdi, ada jua nang sampai mangaku-ngaku nabi.

Habar-habar tadi sakalinya rami jua dipanderakan bubuhan urang kampung Palui.

“Aku hiran Bus ai, kawal kita si Palui itu sudah pina balain banar, baubah banar,” ujar Tulamak mamanderi Garbus.

“Balain dan baubah kaya napa Mak, apakah pina makin ba’alim, makin batubat maka badiam dan bahalwat di rumah haja, jarang kalihatan,” ujar Garbus.

“Aku mandangar habar Bus ai bahwa kawal kita si Palui itu kada kaya dahulu lagi, dahulu jujur, alim, bujur banar tapi wayahini gawiannya pina membengkok,” ujar Tulamak.

“Kalu kaya itu kasihan banar Palui, mungkin inya takaji nang salah maka kada katuju lagi nang lurus dan nang bujur,” ujar Garbus dan langsung mambawai Tulamak mailangi Palui.

Imbah sampai di rumah Palui, lalu bubuhannya manakuni nang bini, tanyata Palui kadada di rumah.

“Wayahini abahnya bagawi di wadah Julak Tambi di subarang sana, tulak baisukan dan bulik kamarian. Bila parlu banar kawa haja didatangi,” ujar bini Palui manunjuk ka subarang sungai.

“Nah, pasti Palui takaji nang salah matan wak HajiTambi itu,” ujar Garbus. Imbah sampai di rumah julak Tambi, si Garbus wan Tulamak batamuan wan Palui.

“Bujurkah ikam wayahini takaji nang salah Lui, kada katuju lagi nang bujur dan nang lurus-lurus, bahkan ujar habar nang lurus pun ikam bengkokakan” ujar Tulamak.

“Sabalum talambat, batubat, babuliklah Lui ai, jangan pina katuju gawian nang salah jalan nang bengkokbengkok,” ujar Garbus.

“Ampun maaf Bus-lah, ampun maaf Mak-lah, tarus tarang haja gawianku wayahini mambengkokakan nang lurus supaya baik dan nyaman dipandang mata. Kalu ikam kada parcaya, itihi itu nah gawianku ... mambengkokakan wasi-wasi pipa, wasi leding wan wasi waja, dibengkokakan gasan baulah pagar rumah, gasan tangga, gasan pagar jambatan, gasan kurungan burung,” ujar Palui.

“Ooo ... jadi ikam bagawi di bengkel julak Tambi ini mambengkokakan wasi, kami kira tadi membengkokakan ajaran ka jalan nang sasat. Maaflah Lui,” ujar Garbus wan Tulamak mahalunyur bulik karna kakalahan. (Sumber Banjarmasin Post)