Pisang Basanga Babanam

"LAKIKU ini, lakas paham. Bila aku ada gawian lain maka inyalah nang manggantiakannya, maharagu anak, maisi drum, batatapas, manjarang banyu wan bamasak," ujar bini Palui mamuji lakinya nang hakun baharaguan di rumah wayah inya sibuk baurganisasi.

 

“Itulah cuntuh laki nang baik, walaupun kabisaannya cuma satangah-satangah,” sahut Tulamak manimpali pujian bini Palui.

 

“Kanapa maka ikam padahakan satangah-satangah Mak, satangah itu artinya bungul kada pintar kada?” ujar Garbus.

 

“Napa buktinya bahwa lakiku dipadahakan kada pintar dan kada bungul,” ujar bini Palui manggasak minta bukti.

 

“Buktinya, samalam wayah bini Palui mahadiri paringatan Hari Ibu, aku bailang ka rumah Palui. Wayah itu aku disurunginya nginuman dan guguduh pisang, guguduh gumbili, bigi nangka. Guguduh pisang wan gumbili itu hirang banar, lalu kutakuni Palui, pisang wan gumbili ini kaya apa mamasaknya Lui, nyaman haja tapi warnanya hirang banar, latat kaya harang,” ujarku manakuni Palui.

 

“Pisang ini pisang babanam maka itu warnanya hirang,” sahut Palui pina supan kasisipuan.

 

“Kalu pisang atawa gumbili babanam mustinya karing, tapi kanapa maka pisang wan gumbili ini pina rasap minyak,” ujar Tulamak.

 

“Haha... hahaaa... Inilah salah satu bukti bahwa Palui ini wayah ditinggalakan bini, kabiasaanya satangah-satangah,” ujar Garbus mulai paham bahwa Palui pangaramput.

 

“Hi’ih, aku mangaku tarus terang Mak ai bahwa pisang wan gumbili itu sabujurnya adalah kusanga, tapi karna aku kada tabiasa baharaguan di dapur lalu manyanganya kahangitan, hirang wan latat. Karna aku supan wan bubuhan ikam maka tapaksa kupadahakan pisang wan gumbili itu adalah babanam padahal sabujurnya pisang wan gumbili itu kahangitan manyanga, karna kabarauan api dan kapanasan minyaknya,” ujar Palui mangakui kabubungulannya. (Sumber Banjarmasin Post)