MANDANGAR bulan kaina cagar ada parlumbaan bahaharatan bunyi burung, maka Palui tulak ka pahuluan mancari burung nang paling harat bunyinya. “Barapa haja kutukari asal bunyinya baik karna parlumbaan ini cagar dapat hadiah duit wan karcis naik kapal tarbang ka Jawa,” ujar Palui dalam hati.
Palui bacari kasana-kamari, kahulu-kahilir basiang-malaman akhirnya tadapat jua inya wan burung nang dicari tadi. Duit sangu hasil bajual sapida buruk dihabisakannya gasan ungkus wan manukar burung itu haja.
“Biar habis duit tapi hati sanang wan kawa tulak ka Jawa bila manang kaina,” ujar Palui sambil lihum bulik ka rumah.
Imbah sampai dirumah digantungnya kurungan burung tadi di puhun nangka parak jamban balakang rumah, supaya kada kalihatan urang. Imbah malam hanyar dibawa masuk...isuknya nangkaya itu pulang sampai sabulanan.
“Pukuknya kampung kita jangan mambuang taruh Bus ai, harus bahasil mandapat juaranya,” ujar Palui wayah batamuan kakawalannya.
“Burung ikam kaya apa Lui ?” sahut Garbus.
“Aku yakin banar pasti manang karna aku sudah manukar burung nang paling harat, suaranya nyaring, bisa balagu, bulunya mangkilat wan awaknya lamak,”
ujar Palui ba-agak.
“Mana burungnya ?” ujar Tulamak batakun.
“Sabalum parlumbaan, burungku kada bulih dilihat. Jangankan bubuhan ikam, biniku haja kada bulih malihat,” sahut Palui.
“Talalu-lalu banar kalu sampai bini ikam kada bulih malihat,” ujar Garbus sambil tatawa mahuhulut Palui.
“Biniku bujur haja kada malihat tapi amun inya handak manjapai kubiarakan haja,” sahut Palui manjawab huhulutan Garbus.
“Nah....... bubuhan ikam ini sudah tasaliwang ka lain panderan,” ujar Tulamak.
Wayah parlumbaan, takumpulan bubuhannya sampai salawi ikung, macam-macam bunyinya. Imbah sampai giliran burung Palui, samunyaan nang hadir takarubut handak mandangarakan kaharatan burung Palui.
“Ayu Lui, aku handak mantis bunyinya,” ujar Tulamak.
“Assalamu alaikum......,” ujar Garbus.
“Kum salaaammmm......,” sahut burung Palui.
“Dasar harat burung Palui,” ujar Tulamak. Ayu kutis lagi ujarnya: “Salamat
pagiiii....,” ujar Tulamak.
“Tut...tuuttt.....cret.... creeeet ....,” sahut burung.
“Ulangi sakali lagi: salamat pagiii...,” ujar Garbus.
“Tut...tuuttt..... brus.... brussss......,” ujar burung.
“Hauuw..Burung ikam ini layau Lui ai, kada paham manyahut,” ujar Garbus sambil batandik karna burung bubuhannya cagar kawa mangalahakan burung Palui. Siapa malatihnya dan di mana ma-andak kurungannya, ujar Garbus batakun.
“Kurungan burung itu sabulanan kusimpan di balakang rumah parak jamban supaya kada kalihatan urang,” ujar Palui panyasalan.
Tidak ada komentar:
Posting Komentar