Sup Tulangan

WAYAH saruan ka urang basalamatan maka Tulamaklah bintangnya karna inyalah nang jadi huhulutan kakawalannya. Tapi biar kaya bapa haja dihuhulut Tulamak kada bisa sarik malah ditatawaakannya haja.

“Biar haja urang manyambati, itu tandanya urang manyayangi aku,” ujar Tulamak.

“Kanapa maka dipadahakan urang manyayangi ikam Mak?” ujar Garbus.
“Karna sakali haja aku kada datang wayah urang basalamatan maka galulah
mancarii aku,” ujar Tulamak.

“Mimang ada dua macam alasan kanapa maka urang mancarii ikam Mak ai,” ujar Palui.

“Alasan napa Lui?” ujar Garbus handak tahu.

“Urang mancarii Tulamak itu, partama karna inya gancang makan dan kadua karna urang handak managih hutang,” ujar Palui manyirit Tulamak.

“Jangan galu Lui, itu nah urang handak basusurung makanan,” ujar Tulamak manunjuk.

“Nah, dasar landap banar panciuman Tulamak, hanyar handak disurung sudah dikatahuinya. Cagar makan ganal kawal kita si Tulamak,” ujar Palui.

“Macam-macam iwaknya Lui ai, ada opor hayam, ada daging masak habang, ada hintalu dan ada jua daging sapi matan urang baqurban,” ujar Tulamak maitihi urang basusurung.

“Kalu kawal kita Tulamak ini saraba cucuk, napa haja nang disurung pasti habis dihantamnya,” ujar Garbus.

“Razaki harus disyukuri jangan ditulak,” sahut Tulamak.

“Ikam iwak napa Lui?” ujar Garbus manawari.

“Kalu iwak hayam, rasanya sudah dulak karna karancakan, hintalu sudah makanan hari-hari,” sahut Palui.

“Aku paham bahwa ikam dasar bapilih banar iwak karna nang rancak kulihat justru ikam iwaknya adalah tahu wan tempe,” ujar Garbus manyindir.

“Bujur-bujur Lui, iwak napa nang ikam katuju supaya kuambilakan ka dalam,” ujar Tulamak.

“Ayu ja padahakan ka dalam, pukuknya jangan hayam, jangan hintalu dan aku kada makan daging,” sahut Palui.

“Kalu kada daging mungkin ikam handak marasani tulangannya,” ujar Tulamak manawari.

“Nah, cucuk tulangan kasukaanku,” ujar Palui lihum sambil mambayangakan makan sup tulangan atawa sup kikil sapi.

Kada lawas kaluarlah Tulamak mambawaakan iwak tulangan tadi dalam mangkuk ganal, lalu manyuruh Palui makan. Palui langsung manuang kuahnya dan manyenduk tulangannya. “Dasar bangsat Tulamak
ini,” ujar Palui gagarunum imbah maitihi tulangan nang ada di piringnya.

“Ini lain tulangan Mak ai, ini bujur-bujur tulang karing karna sama sakali kadada dagingnya,” ujar Palui manyumpah-nyumpah sambil balakas bulik karna supan kakalahan digawi Tulamak. ( Sumber Banjarmasin Post. co. id)