Ganti Rugi

BASUNGSUNGAN hari sudah tumbur kampung, maraga ada nang manyatuk lonceng di gardu ronda. Malihat banyak urang bakumpul Tulamak umpat jua bakajal.

Sakalinya kada urang lain jua nang maabuti kampung, kada lain pada Garbus kawalnya jua.

Kita sabarataan warga di kampung ini harus basatu malawan katidakadilan, pamarasan apalagi kolusi dan korupsi, ujar Garbus baapi-api bapidatu dihadapan warga kampung.

Bus! ujar Tulamak. Kanapa maka ikam pina kasesetanan bapidatu dihadapan warga sa-RTan, ujarnya managur.

Aku sudah pusang, kada tahan lagi ma-arit sarik karna kita sa-RT-an sudah dibunguli Palui, ujar Garbus.

Cuba ikam kisahakan bujur-bujur napa pungkalanya mulai pamulaan sampai habis, jadi kami kada takajut-kajut kalu ikam pina manyarik-nyarik bapidatu, ujar Tulamak malamahi.

Itu nah..... si Palui Katua RT, kada dikira urangnya lamah lambut tapi nyatanya sudah manipu kita sabarataan, inya mangorupsi duit kita. Dahulu kita dimintanya supaya basadia malapas tanah halaman rumah kita sakitar satu sampai dua meter gasan maluasi jalanan. Lalu kita sabarataan manyanggupi, tapi dengan janji harus ada ganti ruginya, ujar Garbus.

Bujur haja, usulan Palui itu dan kita sabarataan sudah manyanggupi, sudah manandatangani parjanjian ganti rugi diatas materai. jawab Tulamak.

Wah.......Tulamak kada kawa dibawa barunding karna inya mambila Palui. Maaf Mak-lah, mungkin ikam sudah tamakani jua duit korupsi Palui gasan ganti rugi tanah halaman, balas Garbus.

Bus, basabarlah..... Itu nah si Paluinya datang, ayu kita takuni bujur-bujur, siapa nang salah siapa nang bujur, ujar Tulamak.

Lui, bung Palui! ujar Garbus pina sarik. Ikam Lui ai dasar talanjur purun manipu warga sa-RT-an. Ikam manyalahgunakan jabatan lalu mangaropsi duit ganti rugi tanah, ikam bantas saurangan. Kami handak tahu, kaya apa cara ikam mahitungnya, ujar Garbus sambil bakacak pinggang.

Sabar, sabaaaarrr... Bus, ujar Palui. Ayu kita buka lagi parjanjian nang sudah sama-sama kita tadatangani, disitu tatulis ganti rugi tanah nang dipakai gasan jalanan. Ayu pikirakan bujur-bujur napa arti ganti rugi itu, artinya bubuhan ikam hakun diganti walaupun rugi. Maka itu tarimalah ganti rugi itu sabarapa adanya sasuai nang kujulung dan jalanan libar ini dinikmati ulih bubuhan warga kita tamasuk warung ikam magin barami, ujar Palui manarangakan.

Nah Bus, bujur kalu napa nang kusambat tadi, ujar Tulamak.

Tapi aku masih bingung Mak ai, sahut Garbus.

Jadi bubuhan ikam sudah katuju ganti rugi, maka itu ihlaskanlah rugi sadikit, ujar Palui. Lain halnya kalau dalam parjanjian itu ditulis ganti untung, maka itu bubuhan sampiyan cagar untung sabarataan, ujar Palui bahimat manjalasakan.

Kaya apa Bus, pahamlah ikam, ujar Tulamak.

Aku makin bangung Mak ai, rupanya kita di kampung ini tatarusan kalah pintar wan Palui, ujar Garbus.

Kalah mata kalah duit ujar Palui sambil manjulung amplop kandal banar ka-anu Garbus wan Tulamak. Lalu ai Garbus kada jadi sarik lagi. (Sumber www.banjarmasinpost.co.id)