Hakun Lamas

BINI Palui diundang ka Balai Desa gasan mahadiri pangarahan wan caramah tentang KB. Karna kabalujuran bini Palui sibuk baharaguan anak, maka tapaksa Palui lah nang mawakilinya. Rupanya kadanya bininya Palui haja nang kada kawa datang, tarnyata bini Garbus umpat bahalangan jua.

“Kita ini tamasuk malalain haja Bus ai, nang diundang gasan partamuan ini adalah bubuhan bini kita tapi nyatanya kita nang datang,” ujar Palui baucap wan Garbus.

“Aku karna tapaksa banar sabab bini masih ma-ambil upah mangatam banih jadi kada kawa datang,” ujar Garbus.

“Sama jua wan aku, biniku kada kawa maninggalakan nang halus, barantuk anam ikungan,” ujar Palui.

“Nah, mustinya bini ikam nang rancak bahintaluan itulah nang harus datang mahadirinya,” ujar Garbus.

“Kukira sama haja, kaina napa nang kita dangar di sini kita kesahakan wan bini di rumah,” ujar Palui.

Wayah itu bubuhan patugas KB wan bidan nang masih anum-anum kada supansupan mambari cuntuh manganai pamakaian gatah kondom, spiral, suntikan wan macam-macam pil. Nang panting ba-KB ini harus bujur-bujur disiplin mamakainya, ta-atur wan kada bulih kada ingat napa nang dianjurakan sasuai aturannya apalagi nang mamakai tanggalan hari ujar bubuhan patugas KB. Maka itu bila tapaksa jua sudah talanjur karna kada katahanan maka muakakan diluar haja, ujar si bidan manarangakan.

Imbah tuntung mandangarakan caramah itu lalu Palui wan Garbus langsung bulikan ka rumah masing-masing.

“Napa nang dikisahakan bubuhan patugas KB wan ibu bidan tadi?” ujar bini Palui batakun handak tahu.

“Banyak banar aturan wan larangannya,” ujar Palui.

“Biar ngalih kawa haja kita gawi,” sahut bininya.

“Ikam kawa manahan tapi aku nang kasasahangan,” sahut Palui.

“Cuba kisahakan syarat napa nang dipadahakan bidan ngalih digawi,” gasak bini Palui.

“Kalu ikam handak tahu jua, bila kita tapaksa jua sudah talanjur manggawi maka muakakan haja di luar, ujar Palui pina supan.

“Muak di luar kaya apa?” ujar bini Palui.

“Artinya bakajut luak di luar,” ujar Palui.

“Ikam katuju hajalah abahnya?” ujar nang bini batakun.

“Kalu aku lalakian kada bapikir panjang umanya ai. Hakun mati lamas haja di dalam, kada apa-apa jua,” sahut Palui.(Sumber www.banjarmasinpost.co.id)