Hidung Parak Pipi

PALUI wan Garbus rami mamandirakan acara tivi wayahini nang kadada supan-supan lagi bajajapaian, bapalukan wan bacaciuman walaupun lain muhrimnya. Bila dilihatakan, kasihan banar bisa marusak mural kakanakan ganarasi muda. Bila mural rusak artinya imannya lamah, bila iman lamah maka pasti kada tagawi parintah agama, kada takuntrul dan kalakuannya jadi layau.

Sual mural kakanakan itu adalah tanggungjawab nang tuha jua ujar Garbus. Hiih, bujur ujar ikam itu Bus ai. Tapi wayahini nang tuhapun banyak jua nang layau, tamasuk nang maulah filem wan sinetrun nang lanji-lanji itu. ujar Palui pina saraba tahu.

Jadi kaya apa baiknya Lui? ujar Garbus.

Baiknya bubuhan nang batugas maurus hiburan ini hususnya tukang sensur, pulisi, jaksa wan hakimnya wani manindak dan mahukumnya ujar Palui.

Nahh.......... wayahini justru bubuhan patugas itulah nang kada wani karna kamasukan banyu, ujar Garbus manyindir.

Kalu sual tindak manindak itu kita kada usah manyambat urang diatas sana. Di lingkungan kita ini haja banyak kalakuan nang kada baik tapi kada manindak, ujar Palui pina musti.

Kalakuan nang kaya apa Lui? ujar Garbus.

Itu, samalam kawal kita si Tulamak bajalan bagandengan wan galuh Putih, bagandengan rapat banar, hidung Tulamak parak banar wan pipinya, parak banar, ujar Palui mayakinakan.

Kurang ajar si Tulamak itu, wani banar handak mancium si Galuh, kaina kalu katahuan urang pasti dipukuli, biar lunyak, ujar Garbus umpat sarik.

Sabujurnya banyak haja urang tahu tapi dan malihatnya tapi samunyaan badiam, kadada nang managurnya, ujar Palui.

Nahhh....... itu Tulamaknya ampah kasini, kutampiling ikam Mak ai, ujar Garbus langsung manampiling Tulamak.

Napa salahku Bus, napa salahklu Bus maka ikm manampiling aku, ujar Talamak.

Itu nah.......Palui bakisah bahwa samalam ikam bajalanan wan galuh Putih lalu hidung ikam parak banar wan pipi, jadi ikam handak manciumlah? Kurang ajar, ujar Garbus.

Bujurkah Lui aku mancium galuh Putih, dimana ikam malihat dan napa buktinya, ayu buktikan! ujar Tulamak bamamai.

Sabar Mak, sabar Bus, baiknya barunding dahulu jangan langsung main tampiling. Aku bujur haja ada bakisah wan Garbus bahwa samalam ikam bajalanan wan galuh Putih, hidung ikam kupadahakan parak banar wan pipi. Cuba pang pikirakan, bujur atawa kada bahwa hidung ikam parak wan pipi.

Karna kalu hidung jauh wan pipi ngarannya panjadian. Aku kadada mamadahakan bahwa hidung ikam parak wan pipi si Galuh tapi kidung ikam parak wan pipi ikam jua, ujar Palui bahasil mangompori Garbus. (Sumber Banjarmasin Post)