Bakabun Kurma

SALAWAS Palui madam bagawi di Makkah, inya kada sawat lagi mahaul aruwah abah wan aruwah umanya, makanya wayah inya bulik kabanua imbah musim haji tadi lalu baungkara handak mahaul jama. Makanya inya sakaluargaan barunding mamastiakan hari salamatannya, lalu siapa-siapa nang disaru wan mamikirakan napa makanannya.

Jadi barunding sakaluargaan ini karna handak babagi tugas wan babagi urunannya, siapa nang manyadiakan baras, iwaknya hayam atawa daging atawa hintalu. Imbah ditantuakan harinya maka masing-masing kaluarga manyumbang sasuai wan bagiannya.

Wayah malam mahaul itu imbah tuntung mangaji, mambaca yasin wan batahlilan, doa lalu langsung basusurung makanan.

Cuba tangguh makanan ini napa iwaknya? ujar Tulamak.

Mudahan kada kaya samalam, iwaknya cuma banyu sup wan kicap, ujar Garbus manyirit ka Tulamak.

Wah......susurungan ini ngalih ditangguh karna iwaknya dipatak dalam nasi kaya urang baaruhan di pahuluan, ujar Tuhirang.

Lalu imbah tuntung makanan, masing-masing bakisah tarnyata iwak dalam nasi nang disurung kada sama.

Aku hintalu masak habang, ujar Garbus. Aku iwak garih batanak, sahut Tulamak. Aku lain lagi, sambal guring hati, ujar Tuhirang.

Kanapa maka basalamatan kada sama iwaknya? ujar Garbus batakun wan Palui.

Baaruhan ini baurunan bahan makanan, jadi tagantung masing-masing kaluarga nang mambarinya, sahut Palui.

Dasar Palui kada kukurang akal supaya kada banyak biayanya, ujar bubuhannya tahu akal Palui.

Imbah tuntung makanan lalu bubuhannya handak bulikan, tapi ditahan Palui satumat. Aku handak basadakah wan sampiyan sabarataan ujarnya, lalu Palui mambagi bungkusan palastik sabungkus saurang baisi kurma.

Alhamdulillah tamakan kurma, ujar Garbus. Dimana ikam dapat kurma banyak banar kami sabungkus saurang ujarnya.

Inilah barkat kami banyak bakabun kurma, sahut Palui.

Dimana Lui andak kabun kurma ikam itu? ujar Tulamak.

Kabunnya jauh tabagi dimana- mana, ada di Jeddah, ada di Madinah wan ada jua di Makkah sahut Palui mantap.

Wah sugih banar kaluarga Palui, kaluarga siapa ampunnya?

Kaluarga Arab disana, kaluarga bubuhan arab jua........ aku cuma umpat manukar haja, ujar Palui.

Dasar Palui kada hilang mahaluyanya.... ujar bubuhannya basurakan. (Sumber Banjarmasin Post)