Kada Basalawar

IMBAH tuntung salam sambahyang maghrib si Palui langsung baundur, duduk basandar di tawing balakang. Rupanya inya kipuh kahumapan banar, makanya langsung inya maambil kipas lalu bahimat inya bakipas.

“Kalu bakipas jangan talalu gancang Lui ai, karna mulai matan tadi kuhatiakan tapih ikam rancak takirap,” ujar Garbus.

“Bujur Lui ai, aku mulai matan tadi jua handak managur ikam karna kulihat tapih ikam babarapa kali taungkap sampai kalihatan burung,” ujar Tulamak.

“Kanapa Lui maka sambahyang kada basalawar?” ujar Garbus.

“Mungkin salawar Palui takana najis, hingga tiap inya sambahyang salawar dalamnya salalu dipacul,” ujar Tulamak.

“Naahhhh........ bubuhan ikam ini rupanya jarang maumpati urang babacaan di masigit,” ujar Palui.

“Ujar tuan guru bila sambahyang haruslah batapih atawa basalawar panjang karna bila basalawar handap sambahyangnya kada sah,” ujar Palui.

“Jadi karna ajaran tuan guru itulah maka ikam bila sambahyang kada basalawar handap,” ujar Garbus. Rupanya karna kada basalawar handap itulah maka kalihatan gual-gual burung ikam.

“Ikam itu salah tafsir Lui ai, ujar Tulamak. Maksud tuan guru itu bila sambahyang haruslah basalawar panjang atawa batapih supaya jangan kalihatan aurat tamasuk lintuhut. Bujur haja kada bulih basalawar handap atawa basalawar dalam karna cagar kalihatan lintuhut,” ujar Garbus manjalasakan.

“Maka itulah aku kada basalawar dalam, kada basalawar handap,” sahut Palui mangarasi.

“Tapi ikam batapih, jadi sudah tatutup lintuhut ikam. Artinya ikam bulih haja bahkan harus basalawar handap gasan palapis dalam, karna lintuhut ikam sudah tatutup wan tapih,” ujar Garbus.

“Oooooo..... jadi maksudnya kaya itulah Bus? Kukira tadi bila kita sambahyang, biar batapih atawa basalawar panjang kada bulih basalawar dalam makanya tapaksa kupacul,” ujar Palui mangakui kasalahannya. “Tapi Bus ai bila sambahyang basalawar dalam rasa kada nyaman karna sudah tabiasa bapacul,” ujarnya.

“Bujur Bus ai, Palui kada kawa basalawar dalam karna inya basangkadi di pinggang wan di pipikangannya hingga rancak banar bagaru kagatalan,” ujar Tulamak manyindir Palui. (Sumber www.banjarmasinpost.co.id)