Minta Batuntun

WAYAH pamulaan ka Banjar dahulu, Palui dibawai bajalanan ulih kamanakannya kuliling kuta. Mulanya naik sapida sudah itu bajukung, bakuliling Pulau Tatas mulai Pasar Lama, Kuin, Basirih sampai pasar Ujung Murung.

Salawas di parahu Palui mamacul salawar panjangannya, tatinggal salawar handap karna takutan kalu tabalik kana galumbang mutur bot.

“Kada usah di pacul salawar panjang pakacil ai,” ujar kamanakannya. “Di sungai ini jarang ada nang tabalik barampakan karna samunyaan tukang kayuh sudah tahu aturannya, di kiwa atawa di kanan, bapiluk ataupun manyalib,” ujarnya pulang.

“Kadanya karna takutan tabalik pang nang ai tapi sayang salawar kalu basah kana banyu karna hanyar bagusuk,” sahut Palui baulah alasan.

Imbah bulikan karumah habis makanan Palui bapadah minta ijin handak bajalanan pulang tapi saurangan haja kada handak dikawali ulih kamanakannya. Rupanya wayah liwat jalan Sudimampir tadi Palui sawat talihat gambar-gambar reklame biskop. Handak minta bawai manuntun lawan kamanakannya inya kada sampai hati. Lalu inya minta ijin ba-asa handak kaluar alasan ada nang handak dicarinya.

Imbah sampai di Biskop Rex (wayah ini Ria sabalum jadi tuku Barata), inya langsung malihati film apa nang main. Rupanya pas banar nang dipilihnya film koboi, apalagi ada gambar bapaluk lawan baciciuman. Lalu inya langsung bakajal dimuhara luket. “Hei bung, jangan bahaharatan,” ada nang managur.

“Aku handak manukar karcis handak manuntun, kada handak bakalahi,” sahut Palui.“Kalu handak manuntun hurmati kami nang antri disini,” ujar nang lainnya.

“Oo maaf, aku kada tahu,” ujar Palui langsung manyalami urang nang managur
tadi. Imbah manukar karcis, inya umpat jua antri masukan. Sampai di muhara lawang, Palui malihatakan karcisnya lawan tukang jaga.

“Mana karcisnya?” ujar panjaga lawang.

“Ini nah,” ujar Palui sambil mangganggam karcisnya tapi kada hakun manjulung. “Ayu, mana karcisnya?” lalu dijulungnnya lalu tukang karcis marabitnya.

“Kanapa dirabit?” ujar Palui batakun. “Ayu ja rabit halus- halus, aku kada sarik karna aku sudah manukar dua lambar. Ini nang sabutingnya kusimpani dalam kantung,” ujar Palui.

“Ini numur kursinya,” ujar patugas manjulung rarabitannya. Palui langsung masuk, diantar panjaga bibinian sambil basintar karna lampunya sudah dipajahi.

“Wah.... kadapnya ujar Palui. Tulung pang aku dituntun kaina tasipak urang, sambil tangannya bahahar manjapai tangan bibinian nang maantarnya tadi sampai ka kursinya. “Tarima kasih ding lah,” ujarnya. Sambil duduk mata kujupkujup, Palui bapikir dalam hati kalu kaya itu isuk aku manuntun pulang, kaina kutakuni dimana rumahnya urangnya ramah tamah lawan langkar banar bibinian itu tadi,” ujar Palui dalam hati.

“Pantas haja di Banjar ini kada kaduitan, banyak nang dilihat wan didangar, banyak nang dikahandaki, samunyaan parlu uncui,” ujar Palui imbah inya bulik ka rumah mamarinanya. (www.banjarmasinpost.co.id)