Dijalani Taksi

SATIAP Ahad Palui katuju banar mambawai kakawalannya bajalan ka Banjar, pasti tujuannya kada lain pada ka pasar tungging mancari baju-baju nang murah. Apalagi bila pina banyak duit.

“Kita liwat mana Lui? ujar Tulamak manakuni Palui.

“Kaya rajin haja, baputar dahulu ka kota malihat-lihat kalu ada nang pina nyaman dilihat.”

“Aku sabujurnya kuler jalan kota Lui ai, sasak banar lawan banyak lampu habangnya,” ujar Garbus.

“Itu malatih kasabaran kita Bus ai. Amun kita sabar, kamana haja pasti sampai,” ujar Palui mamadahi Kada lawas buhannya tulakan lalu mamutar ka jalan ganal di pal satu liwat jambatan Sudimampir. Arahnya liwat pasar lama. Sampai di simpang ampat Balitung pas takana lampu habang banyala.

“Iya am kana sial kita kana lampu habang,” ujar Tulamak gagarunum tapaksa bamandak.

“Bubuhan ikam kada pintar. Urang dilihati matan jauh lampunya, amun masih lampu habang kita bagamat, pas lampu kuning hanyar kita lajui jadi kada sawat tamandak,” ujar Palui jua mamandakakan sapida muturnya ka sabalah kiri mancari nang takusung.

“Lui, ikam jangan talalu kakiri situ, ngalih urang amun handak bajalan nang langsung babiluk ka kiri,” ujar tukacil nang mambuncing di belakang managur Palui.

“Kada papa Cil ai, kada mungkin jua mutur marumpak kita,” ujar Palui mangaras. Rahatan asik mahadang lampu hijau, tadangar Palui takuciak.

“Aduh batisku! batisku sakit!“ ujar Palui bahalulung.

“Kanapa Lui batis ikam?” ujar Tuhirang malihati ka batis Palui. Pas dilihati tabarungan taksi kuning rahatan bajalan babilok ka kiri, bannya takana batis kiri Palui nang baunjur ka tanah.

“Kada ma-asi pang lawan aku, batis kiri ikam bahawar ka kartak, wajar haja dijalani taksi,” ujar Tukacil maniwas.

“Amun bamandak jangan di sabalah kiri, di kalaluan urang pas ai takana ban,“ ujar Tukacil lagi mamadahi.

“Untung haja jua ban taksi kuning haja nang malindas, jaka truk nang liwat, bisa lepeh batis ikam,” ujar Tulamak mahuhulut.

“Sial jua aku hari ini... Ban taksi kuning gin sakit apalagi ban truk,” ujar palui takuringis kasakitan. (sumber Banjarmasin post)