SABAN handak guringan Palui wan bininya pasti bapapandiran, bagagayaan sambil bagaritikan.“Bila managur atawa manyuruh aku jangan di hadapan urang ban_yak
kaya si Garbus atawa Tulamak Tuhirang, kaina aku dihuhulutnya bahwa aku diparintah bini,” ujar Palui mamadahi. “Karna wayahini pinanya banyak bubuhan ibu-ibu pajabat nang harat pada abahnya, wani manyuruh karyawannya sakahandak hati, mamakai mutur dinas sakahandaknya,” ujar Palui mambari cuntuh.
“Itu kada ibunya nang harat tapi si lakinya si pajabatnya nang bungul kada kawa ma-atur bininya,” ujar bini Palui manjawab.
“Nah, jadinya ikam paham artinya kita kawa kada bahualan karna masing-masing sudah maklum tugas kawajibannya,” ujar Palui.
“Tapi ulun bulih haja kalu bila ada kada sapandapat wan sampiyan,” ujar bininya.
“Kita ini negara demokratis, bulih haja baunjuk rasa asal malamnya kita harus damai supaya jangan satris, “ujar Palui bagaya.
“Sampiyan abahnya ai kulihat pina ada jua barahasiaan baisi simpanan,” ujar bini Palui maungkai kisah.
“Sumpah kadada,” sahut Palui takajut.
“Kanapa wayah garing samalam sampiyan pina basasambat macam-macam, tasambat jua ngaran bibinian,” ujar bininya.
“Wayah pabila?” ujar Palui.“
Wayah sampiyan garing panas samalam,” sahut nang bini.
“Biasa haja urang garing, apalagi garing panas bisa maigau karna kapanasan,” ujar Palui. “Wayah itu kaya apa igauku atawa amanganku?” ujar Palui handak tahu.
“Wayah sampiyan kapanasan itu kupupuk wan banyu es lalu ulun suruh baingat-ingat, ulun suruh bazikir ya Allah…… ya Allah….. mulanya sampiyan bujur haja manyahut ya Allah…… ya Allah tapi kalalawasan lalu baubah sambatan sampiyan jadi ya Aluh…..ya Aluh….. ya Aluh,” ujar bininya bakisah.
“Itu artinya kacicintaanku wan ikam ding-ai,” ujar Palui.
“Ayu padahakan Aluh siapa, Aluh siapa?” ujar bininya pina sangit.
“Aluh itu kada lain ikam jua si Aluh Zaleha,” ujar Palui sambil mamagut ka bininya.
“Biarpun sampiyan bapadah si Aluh itu adalah ulun, tapi tatap ulun cari siapa simpanan sampiyan itu,” ujar bininya maancam. (Sumber Banjarmasin Post)
