Mancariakan Tatambahan

IMBAH bulik matan madam ka banua urang Palui pina makin basandu kada tapi banyak bunyi kaya dahulu lagi. Kakawalannya umpat bingung malihat Palui banyak parubahannya.

Inya banyak bakurung di rumah, hanya sakali-sakali haja umpat bakarubut di warung atawa di gardu runda.

“Baiknya kita ilangi baimbai gasan mahibur hatinya sambil umpat batakun napa nang jadi pikirannya,” ujar Garbus.

Lalu bubuhannya tulakan bailang ka rumah Palui, ada nang mambawa gumbili, mambawa kuini wan ada jua nang babawaan manisan.

“Ui Lui, kanapa maka ikam pina basandu? Mustinya malah bagambira tatamuan dangsanak-dangsanak wan kaluarga lainnya, tamasuk kami kakawanan bahari,” ujar Garbus.

“Aku ada masalah ganal Bus ai, jadi pikiran siang malam nang mulanya kada kukira sama sakali,” ujar Palui.

“Kami sabarataan ini kawan bahari sudah kaya dangsanak, samuak saliur, makanya bila ikam ada masalah di ungkai jangan di kasak saurangan, kaina kita garumuti manuntungakannya,” ujar Tulamak.

“Aku bulik ka banua ini sabujurnya handak ziarah haja tapi sakalinya bubuhan kaluarga Zaleha nang di hulu sana mamaksa manyuruh lakas badatang,” ujar Palui taungut.

“Itu artinya habar baik makanya ikam jangan basadih mustinya harus bagambira,” sahut Garbus.

“Aku balum siap napa-napa kacuali manyiapakan awak haja,” ujar Palui.

“Jangan hawatir Lui ai, kaina kami barunding wan kakawalan mambantu ikam sapanuhnya,” sahut bubuhannya.

Imbah bamufakat, lalu bubuhannya babagi tugas ada nang manukar bakul, ember, ada nang manulis papan supaya jalan bagamat lalu ada jua nang mainjam mik langgar.

“Ikam Mak ai tukang umumakan supaya mutur-mutur nang lalu disini bisa manyumbang, Tuhirang wan Tukacut batupi purun sambil mahantai pambarian urang,” ujar Garbus maatur gawi.

“Barapa haja urang mambari ikam harus maucapakan tarimakasih wan langsung doaakan supaya lakas naik haji, baiman wan parazakian mudahan masuk sorga.... “ ujar Garbus mambari patunjuk.

“Hallo, hallo..... mohon sumbangan sukarela gasan kasajahteraan anak yatim piatu, bapahala sampiyan manulung sasama ummat,” ujar Tulamak kukuriak.

“Alhamdulillah, samingguan bapintaan takumpul duit ratusan ribu rupiah. Aku kada tasalah kalu Mak bapintaan manyambat gasan anak yatim piatu, karna si Palui itu sudah kada ba abah uma lagi ujar Garbus.

“Ayu kita tulakan karumah Palui manjulung hasil bapintaan ini gasan jujuran wan basalamatannya,” ujar Garbus mambawai kakawalannya.

“Tarimakasihlah....... bubuhan ikam baik hati sabarataan kawa mancariakan duit tambahan gasan aku kawin,” ujar Palui sambil maragapi kakawalannya tunggal ikungan karna kasukaan.(Diambil dari Harian Banjarmasin Post).

Bapajam

WAYAH masih anum, atawa masih balum baanakan, bini Palui tu tamasuk urang nang kada mau katinggalan jua. Apa aja ada barang jualan nang hanyar kaluar pasti inya handak marasai. Wayah ini banar ai, rahat sudah baisian anak inya kada tapi handak lagi nang kaya bahari tu.

Nang paling diingat Palui tu rahat bininya tu bilang kaya kasasahangan banar minta tukarakan sapida mini. Apa inya malihat urang subalah rumah baisian sapida mini, lalu inya handak jua.

Untung jua waktu itu bini Palui kada handak minta tukarakan sapida mutur. Cuba jaka sapida mutur, kada kah banyak lagi duit nang dikaluarakan Palui.

“Nang kaya itu nah. Tukarakan ulun nang warna habang anum,” ujar bini Palui sambil manunjuk sapida mini ampun jiran.

Tuhuk Palui mambisai, tatap ai bininya tu handak minta tukarakan. Kada kawa ditawar-tawar tu pang. Saitu saini harus ada tu pang.

Sambil bapicik kapala Palui mambawai bininya tulak ka pasar manukar sapida nang dikahandaki. “Kita babica aja ka pasar lah. Nyaman bulikannya kada ngalih mambawa sapida nang ditukar, tinggal ditunggang aja,” ujar Palui.

Imbah sudah tadapat, Palui manawar haraganya bahimat wan nang ampun tuku. Amun malihat matan jauh Palui wan nang ampun tuku batatawaran, iya banar urang bakalahian tu pang. Sama-sama bakancangan urat gulu.

Singkat kisah, akhirnya tatukari jua sapida nang dikahandaki tu. Uma, liwar himungnya nang bini. Paribasanya tu karing gigi maraga bakurihing tarus.

“Ayu ditunggang sapidanya. Apa lagi dihadang?” ujar Palui managur bininya nang haur mancangangi sapida nang hanyar ditukar tu.

“Aku maingatakan dahulu. Masih bisa kah kada kah aku basapida,” ujar bini Palui manyahuti. Masam muha Palui mandangar sasahutan bininya.

“Imbah pang kaya apa? Aku ai nang maninjak lah sampai ka rumah,” ujar Palui pulang.

Masih sambil takurihing, bini Palui bakuling kapala wan manyahuti, “Kada. Ulun aja nang maninjak. Ingatai ulun lagi caranya,” ujar nang bini.

Imbah babuat, Palui haur manahaniakan aja supaya kada rabah. Apa nang minta tukarakan sakalinya kada tapi bisa lagi basapida. Rahat parak rumah, pas tuturunan jalan sapida nang dikayuh bini Palui magin balaju.

Kukuriak Palui managur bininya supaya bagamat. “Jangan laju ding! Kaina rab.....” ujar Palui. Balum tuntung baucap, mandabau sapida badua laki bini tu rabah masuk ka gut.

“Ham mambari takutan banar ikam ni. Makanya ujarku tadi hati-hati,” ujar Palui sambil mamusut luka di lintuhut.

“Pian aja kah nang takutan. Ulun gin takutan banar tadi. Liwar takutannya ulun tadi sambil bapajam tahu lah!” ujar bini Palui manyahuti.

Bah, cucuk ai rabah amun sambil bapajam. Jakanya mangacak rim bisa kada rabah. Gagarunum saurangan Palui.(sumber asli diambil dari harian banjarmasin post)